මෑතකදී සිදුකල කැබිනට් සංශෝධනයත් සමග ආයතන විෂයපතයන් බෙදා වෙන්කිරීමේදී ශ්රී ලංකා ත්රිපෝෂ සමාගම වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යාංශය යටතට පත්කරන ලදී.
එම පත්කිරීමට අනුව වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්යා ගරු. වසන්ත සමරසිංහ මහතා ජා-ඇල පිහිටි ශ්රී ලංකා ත්රිපෝෂ සමාගම් පරිශ්රයේ නිරීක්ෂණ චාරිකාවක් සඳහා ඊයේ (30) දිනයේ සහභාගී විය.
මෙහිදී කර්මාන්ත පරිශ්රය නිරීක්ෂණයෙන් අනතුරුව වත්මන් සභාපති අමල් අත්තනායක මහතා සහ එහි අධ්යක්ෂ මණ්ඩලය සමඟින් ත්රිපෝෂ සමාගමෙහි වර්තමාන තත්වය සහ ඉදිරියේදී අපේක්ෂිත ඉලක්කයන් පිළිබඳව සාකච්ඡාවක නිරත විය. පසුගිය රජය සමයේ ඈවර කිරීමට නියමිතව තිබූ මෙම ශ්රී ලංකා ත්රිපෝෂ සමාගම, නව රජය බලයට පත් වීමෙන් පසු සෞඛ්ය අමාත්යාංශය යටතේ නැවත ස්ථාපිත කළ අතර, පසුගියදා සිදු කළ අමාත්ය මණ්ඩල සංශෝධනය සමඟින් නිකුත් කළ ගැසට් නිවේදනය මඟින් වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්යාංශය යටතට පත් කරන ලදි.
ආහාර සුරක්ෂිතතාවය වඩාත් තහවුරු කිරීම සඳහා ප්රධාන කාර්ය භාරයක් ඉටු කිරීම වෙනුවෙන් මෙම ත්රිපෝෂ සමාගම, වෙළෙඳ අමාත්යාංශය වෙත පැවරීම සිදු කරන ලද අතර සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා පසුගිය කාල සීමාව තුළ, මෙම ආයතනය ජනතාව අතරට ගෙන යමින් නිෂ්පාදනය අඛණ්ඩව සිදු කරගෙන යාමට ද කටයුතු කරන ලදි.
අමුද්රව්ය සපයා ගැනීමේදී ඇති බාධාවන් ඉවත් කොට මෙහි නිෂ්පාදනය කරනු ලබන ත්රිපෝෂ ඇතුළු අනෙකුත් නිෂ්පාදනයන් සඳහා අවශ්ය බඩ ඉරිඟු, සෝයා වැනි අමුද්රව්ය අඛණ්ඩව සැපයීම තුළින් එම නිෂ්පාදන කටයුතු ඉහළ නංවා කුඩා දරුවන්, ගර්භණී මව් වරුන් හා කිරි දෙන මව් වරුන් වෙනුවෙන් ත්රිපෝෂ ලබා දීමට අදාළ කටයුතු විධිමත්ව සිදු කිරීමටත් සුපෝෂ, කුකීස්, කප් කේක්, Calorie Bar සහ අග්ගලා ඇතුළු අනෙකුත් නිෂ්පාදන ජනතාව අතර ප්රචලිත කිරීමටත් අවශ්ය මඟ පෙන්වීම විෂය භාර අමාත්යවරයා ලෙස මෙහිදී සිදු කරන ලදි.
ආයතනය පවත්වාගෙන යාමේදී පැන නඟින ගැටලු සම්බන්ධයෙන් විසඳුම් ලබා දීමටත්, ආයතනයේ සේවකයින්ගේ ඉල්ලීම් හා සුභසාධනය වෙනුවෙන් කඩිනමින් නිසි මැදිහත්වීම් සිදු කර ක්රියාමාර්ග ගැනිමටත් ඉදිරියේදී ත්රිපෝෂ සමාගමේ නිෂ්පාදනයන් සමුපකාර ව්යාපාරය හරහා පාරිභෝගිකයා වෙත ලබා දීමට හැකි ක්රමවේදයන් පිළිබඳවත් මෙහිදී සාකච්ඡා කරන ලදි.
මෙම නිරීක්ෂණ චාරිකාව සඳහා ආර්ථික සංවර්ධන නියෝජ්ය අමාත්ය නිශාන්ත ජයවීර මහතා, පාර්ලිමේන්තු මන්ත්රී ස්ටෙෆ්නි ප්රනාන්දු මහතා, වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්යාංශයේ ලේකම් කේ. ඒ. විමලෙන්තිරරාජා මහතා, ජ්යෙෂ්ඨ උපදේශක ආචාර්ය ශාන්ත ජයරත්න මහතා ඇතුළු අමාත්යාංශ නිලධාරීන් පිරිසක් මෙන්ම සමුපකාර තොග වෙළද සංස්ථාවේ (සතොස) සභාපති කෝසල විල්බාව මහතා, ශ්රී ලංකා රාජ්ය වාණිජ (විවිධ) නීතිගත සංස්ථාවේ සභාපති රවින්ද්ර ප්රනාන්දු මහතා, ශ්රී ලංකා ත්රිපෝෂ සමාගමේ සභාපති අමල් අත්තනායක මහතා ඇතුළු ත්රිපෝෂ සමාගමේ අධ්යක්ෂ මණ්ඩලය, කළමනාකාරිත්වය, නිලධාරීන් සහ එහි සේවක පිරිස සහභාගී වූහ.
#ministryoftrade #THRIPOSHA #suposha #thriposhasuposha
